وللمشاعر كلمات
ياريت يا رب تيجى
ميشيل رزق الله
ياريت يا رب تيجى .. قابلنى أى ساعه
وقت م اكون لوحدى .. أو كنت مع جماعه
وشيل منِّى القساوه .. وعلِّمنى الوداعه
ياريت يارب تيجى
موجود فى كل همسه .. موجود فى كل لمحه
موجود فى كل لمسه .. فى زهره ولون وقمحه
فى قلوب عارفاك ما تنسى .. وف كلمه تقول : مسامحه
ياريت يارب تيجى
موجود فىَّ .. ف مكانى ..فى الدنيا .. فى الوجود
فى كونى .. فى كيانى .. فى العالم لك وجود
فى عالم كلُّه فانى .. ياحياه مالهاش حدود
ياريت يارب تيجى
موجود فى الكون دا لكن .. ألقاك ازَّاى فى قلبى
حقيقى ف قلبى ساكن .. وبتغفر كل ذنبى
إملا فىَّ الأماكن .. واملك على كل دربى
ياريت يارب تيجى
تعالى قابلنى مَرَّه .. دا قلبى حياته مُرَّه
مليان بالشر لكن .. تقدر تملاه مسرَّه
هتروح منى الخطيَّه .. لو بس تجينى مرَّه
ياريت يارب تيجى
يارب ياأحلى عِشره .. أنا هارب للخطايا
وصِّتنى وصايا عَشْره .. ونسيت كل الوصايا
الدنيا ف عينى كِشْره .. وانت أملى ورجايا
ياريت يارب تيجى
ياريت احمل صليبك .. واتعلِّم من أياتك
واكون دايماً رفيقك .. بحُب يكون لذاتك
يارب انا عبدك انت .. حررنى بمعجزاتك
ياريت يارب تيجى
ياريت يارب تيجى ..واكون عامل حِسابى
ويبقى قلبى تايب .. وتقبلنى بجوابى
وملكوتك يكون لى .. بابى ساعة إيابى
ياريت يارب تيجى
.jpg)
0 التعليقات:
إرسال تعليق